சிங்கள – தமிழ் புத்தாண்டை முன்னிட்டு, இலங்கை முழுவதும் சமையல், உற்பத்தி மற்றும் சந்தைப்படுத்தல் தொடர்பான வேலைகளில் ஈடுபட்டுள்ள 50,000 பேருக்கு ‘டைபாய்டு’ தடுப்பூசியை வழங்குவதற்கான சிறப்புத் திட்டத்தை சுகாதார மற்றும் வெகுஜன ஊடக அமைச்சின் வழிகாட்டுதலின் கீழ் தொற்றுநோயியல் பிரிவு சமீபத்தில் செயல்படுத்தியுள்ளது.
கடந்த காலங்களில் நாட்டில் டைபாய்டு பாதிப்பு குறித்து தெரிவிக்கப்பட்ட தரவுகளின் அடிப்படையில் தயாரிக்கப்பட்ட முன்னுரிமைப் பட்டியலின் அடிப்படையில் இந்தத் திட்டம் செயல்படுத்தப்படுகிறது.
கடந்த சில ஆண்டுகளின் புள்ளிவிவரங்கள், கடந்த காலகட்டத்தில் டைபாய்டு நோயின் பரவல் சமையல், உணவு உற்பத்தி மற்றும் சந்தைப்படுத்தல் துறைகளில் அதிகமாக அவதானிக்கப்பட்டது.
எனவே, அந்தத் துறைகளில் பணிபுரிபவர்களை இலக்காகக் கொண்டு இந்த தடுப்பூசி திட்டம் செயல்படுத்தப்படும் என்று சுகாதார மற்றும் வெகுஜன ஊடக அமைச்சின் தொற்றுநோயியல் பிரிவின் வைத்தியர் திலங்க ருவான் பத்திரண தெரிவித்தார்.
இந்த திட்டத்திற்காக, நாட்டின் ஒவ்வொரு மாவட்டத்தையும் உள்ளடக்கும் வகையில் பிராந்திய தொற்றுநோயியல் நிபுணர்கள் பணியமர்த்தப்பட்டுள்ளனர்.
மேலும், நாடு முழுவதும் காணப்படும் 358 சுகாதார வைத்திய அதிகாரி பிரிவுகளிலிருந்து சேகரிக்கப்பட்ட தரவுகளின் அடிப்படையில் இந்த டைபாய்டு தடுப்பூசி திட்டம் செயல்படுத்தப்படுகிறது.
இந்த திட்டம் நடமாடும் உணவு விற்பனையாளர்கள், உணவக ஊழியர்கள், நெரிசலான இடங்களில் உணவு விற்பனையாளர்கள் மற்றும் கல்வி நிறுவனங்கள், பாடசாலைகள் மற்றும் பிற நிறுவனங்களுக்கு குழுக்களாக உணவு தயாரித்து, விற்பனை செய்து, விநியோகிக்கும் தனிநபர்களை மையப்படுத்தி ஆரம்பிக்கப்பட்டுள்ளது..
டைபாய்டு காய்ச்சலிலிருந்து பாதுகாக்க இந்த தடுப்பூசியை ஒவ்வொரு 3 வருடங்களுக்கும் எடுத்துக்கொள்ள வேண்டும் என சுகாதார அதிகாரிகள் பரிந்துரைத்துள்ளனர்.
சுகாதார அமைச்சின் வழிகாட்டுதலின் கீழ் செயல்படுத்தப்படும் இந்த இலவச தடுப்பூசி திட்டம் பற்றிய மேலதிக தகவல்களை, தொற்றுநோயியல் பிரிவு மற்றும் நாடு முழுவதும் அமைந்துள்ள சுகாதார வைத்திய அதிகாரி அலுவலகங்களில் பெற்றுக்கொள்ள முடியும்.
Link : https://namathulk.com
