2002 ஆம் ஆண்டு 5 ஆம் இலக்க அதிகாரிகளை நீக்குதல் (நடைமுறை) சட்டத்தின் கீழ், பணிநீக்கம் செய்யப்பட்ட பொலிஸ்மா அதிபர் தேசபந்து தென்னகோனை நீக்குவதற்கு அரசாங்கம் தற்போது விதிகளைப் பின்பற்றி வருவதாக அமைச்சரவை பேச்சாளர் அமைச்சர் நளிந்த ஜயதிஸ்ஸ தெரிவித்தார்.
அமைச்சரவை முடிவுகளை அறிவிக்கும் ஊடக சந்திப்பிலேயே அமைச்சர் இதனை கூறினார்.
இந்தச் சட்டத்தின் கீழ், பொலிஸ்மா அதிபரை நீக்கக் கோரும் ஒரு முன்மொழிவை 75க்கும் மேற்பட்ட பாராளுமன்ற உறுப்பினர்கள் அங்கீகரிக்க வேண்டும் எனவும் அமைச்சர் கூறினார்.
அத்துடன், 115 அமைச்சர்கள் கையொப்பமிட்ட ஒரு முன்மொழிவு ஏற்கனவே சபாநாயகரிடம் ஒப்படைக்கப்பட்டுள்ளதாகவும் அமைச்சர் சுட்டிக்காட்டினார்.
கடந்த 25ஆம் திகதி, தென்னகோனை நீக்குவதற்கான ஒரு பிரேரணை, பொலிஸ்மா அதிபருக்கு எதிரான 27 ஊழல் குற்றச்சாட்டுகளை கோடிட்டுக் காட்டி தேசிய மக்கள் சக்தி பாராளுமன்ற உறுப்பினர்கள் குழுவால் சமர்ப்பிக்கப்பட்டதாக அமைசர் தெரிவித்தார்.
எதிர்க்கட்சித் தலைவர் சஜித் பிரேமதாச இந்த நடவடிக்கையை ஆதரித்துள்ளதுடன், ஐக்கிய மக்கள் சக்தி இதற்கு முழு ஆதரவளிக்கும் என கூறியுள்ளதாகவும் அமைச்சர் வலியுறுத்தினார்.
அத்துடன், குறித்த பிரேரணை பாராளுமன்றத்தில் நிறைவேற்றப்படும் என அரசாங்கம் நம்பிக்கை கொண்டுள்ளதாகவும் அமைச்சர் தெரிவித்தார்.
பொலிஸ்மா அதிபரை நீக்குவதற்கான அரசியலமைப்பு விதிகளை விளக்கிய அமைச்சர் ஜெயதிஸ்ஸ, ஏப்ரல் 8 அல்லது 9 ஆம் திகதி திட்டமிடப்பட்டுள்ள அடுத்த பாராளுமன்ற கூட்டத்தின் போது இந்த முன்மொழிவு எடுத்துக்கொள்ளப்பட்டு பெரும்பான்மையினரால் ஏற்றுக்கொள்ளப்பட வேண்டும் என்றார்.
அதேவேளையில், பதவி நீக்கம் குறித்து ஆலோசிக்க ஒரு விசாரணைக் குழு நியமிக்கப்பட வேண்டும் எனவும் அமைச்சர் தெரிவித்தார்.
இந்தக் குழு முதன்மையாக தலைமை நீதிபதியால் பரிந்துரைக்கப்படுவதோடு, அதில் பதவியில் இருக்கும் உயர் நீதிமன்ற நீதியரசர், தேசிய பொலிஸ் ஆணைக்குழவின் தலைவர் மற்றும் ஒரு மூத்த நிர்வாக அதிகாரி ஆகியோர் உள்ளடங்குவர் என அமைச்சர் சுட்டிக்காட்டினார்.
குறித்த விசாரணையை தொடர்ந்து, சபாநாயகரிடம் அறிக்கை சமர்ப்பிக்கப்பட்டு பாராளுமன்றத்தால் அங்கீகரிக்கப்பட வேண்டும் எனவும் அமைச்சர் வலியுறுத்தினார்.
Link : https://namathulk.com
