எதிர்வரும் தமிழ், சிங்கள புத்தாண்டிற்காக சொந்த ஊர்களுக்குச் செல்லும் பயணிகளின் வசதிக்காக, எதிர்வரும் 11ஆம் திகதி முதல் விசேட ரயில் சேவையை முன்னெடுக்க ரயில்வே திணைக்களம் திட்டமிட்டுள்ளது.
இந்த விசேட ரயில் சேவை இரண்டு கட்டங்களாக முன்னெடுக்கப்படும் என்று திணைக்களம் தெரிவித்துள்ளது.
அதன்படி, 11, 12 மற்றும் 13ஆம் திகதிகளில் கொழும்பிலிருந்து பதுளை, அனுராதபுரம், காலி, கண்டி மற்றும் பெலியத்த ஆகிய பகுதிகளுக்கு விசேட ரயில்களை இயக்க நடவடிக்கை எடுக்கப்பட்டுள்ளது.
அத்துடன் புத்தாண்டு நிறைவடைந்து கொழும்பு திரும்பும் மக்களுக்காக எதிர்வரும் 18, 19 மற்றும் 20 ஆம் திகதிகளில் விசேட ரயில் சேவைகள் முன்னெடுக்கப்படும் என்றும் ரயில்வே திணைக்களம் தெரிவித்துள்ளது.
இதற்கிடையில், புத்தாண்டுக்காக சொந்த ஊர்களுக்குச் செல்லும் மக்களுக்காக, இலங்கை போக்குவரத்து சபை 9ஆம் திகதி முதல் மேலதிகமாக 500 பேருந்துகளை முன்னெடுக்க திட்டமிட்டுள்ளது.
Link: https://namathulk.com
